Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те,// спасти́ся, мо́лимся, душа́м на́шим.

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

Помяни́, Го́споди, я́ко благ, рабы Твоя́,/ и, ели́ка в житии́ согреши́ша, прости́:/ никто́же бо безгре́шен, то́кмо Ты,// моги́й и преста́вленным да́ти поко́й.

Со святы́ми упоко́й,/ Христе́,/ ду́ши раб Твои́х,/ иде́же несть боле́знь, ни печа́ль,/ ни воздыха́ние,// но жизнь безконе́чная.

Проро́ка Твоего́ Оси́и па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая,// сего́ ра́ди тя почита́ем, проро́че блаже́нне, Оси́е сла́вне.

Пра́выми стезя́ми после́дуя за́поведем Го́спода Твоего́, проро́че Оси́е,/ испо́лнился Ду́ха Свята́го/ и, прие́м дар проро́чествия,/ провозгласи́л еси́ Изра́илю Христо́во, хотя́щее в после́дняя ле́та бы́ти, прише́ствие,/ облича́я заблу́ждшия лю́ди от пути́ пра́ваго/ и наставля́я на путь, веду́щий в Вы́шний Иерусали́м,/ иде́же ны́не предстоя́,// моли́ся непреста́нно о всех нас.

Я́ко пресве́тлая звезда́,/ просия́ Боже́ственными чудесы́/ святы́й о́браз Твой, Изба́вительнице,/ луча́ми благода́ти и милосе́рдия Твоего́/ озари́в в нощи́ скорбе́й су́щих./ Пода́ждь у́бо и нам, Всеблага́я Де́во,/ избавле́ние от бед,/ исцеле́ние неду́гов душе́вных и теле́сных,// спасе́ние и ве́лию ми́лость.

Избавле́ние Принося́щая всем,/ от се́рдца Тебе́ призыва́ющим,/ принеси́ избавле́ние ско́рое/ и нам, в лю́тых беда́х погиба́ющим// и в Тебе́ Едино́й избавле́ние на́ше на Бо́зе полага́ющим.

Ко ико́не Твое́й, Пресвята́я Госпоже́,/ бе́дствовавшии с ве́рою прите́кше,/ заступле́нием Твои́м изба́вишася от злых,/ но я́ко Ма́терь Христа́ Бо́га,/ и нас свободи́ от лю́тых обстоя́ний,/ вре́менных и ве́чных, да зове́м Ти:// ра́дуйся, Изба́вительнице на́ша от всех бед.

О, Ма́ти Бо́жия, по́моще и защи́та на́ша, егда́ попро́сим, бу́ди изба́вительнице на́ша, на Тя бо упова́ем и всегда́ вседу́шно Тя призыва́ем: умилосе́рдися и помози́, пожале́й и изба́ви, приклони́ у́хо Твое́ и на́ши ско́рбныя и сле́зныя моли́твы приими́, и я́коже хо́щеши, успоко́й и обра́дуй нас, лю́бящих твоего́ Безнача́льного Сы́на и Бо́га на́шего. Ами́нь.

По́стнически преподвиза́вся на горе́,/ у́мная враго́в ополче́ния всеору́жием Креста́ погуби́л еси́, всеблаже́нне./ Па́ки же ко страда́льчеству/ му́жески обле́клся еси́,/ уби́в Копрони́ма мече́м ве́ры;/ и обои́х ра́ди венча́лся еси́ от Бо́га,// преподобному́чениче Андре́е, приснопа́мятне.

Пра́зднует днесь Ца́рствующий град/ пра́здник пресве́тлый светоно́сныя Твоея́ па́мяти,/ вся́кий призыва́я град и страну́;/ ра́дуется бо, я́ко име́я сокро́вище ве́лие,/ многострада́льное твое́ те́ло,// Андре́е му́чениче, Правосла́вия свети́льниче.

Му́жества тезоимени́тому благодаре́ние,/ я́ко благоче́стия тайноглаго́льнику,/ похва́льная воззове́м от любве́ тебе́, Богоблаже́нне,/ но, я́ко име́я дерзнове́ние ко Го́споду,/ от вся́ких лю́тых ны спаси́, да пое́м:// ра́дуйся, о́тче приснопа́мятне.

Я́ко вели́ко сокро́вище и бога́тство некрадо́мо/ к нам прии́де из Ки́пра, Ла́заре,/ Про́мыслом всех Бо́га, повеле́нием царя́ благочести́ва,/ подая́ чту́щим тя исцеле́ния да́ром,/ избавля́я от бед и от вся́каго вре́да,/ ве́рою взыва́ющих ти:// спаси́ всех моли́твами свои́ми, Ла́заре о́тче наш.

Взы́де, я́ко звезда́ пресве́тлая,/ от Ки́пра честны́я мо́щи твоя́, Ла́заре,/ Ца́рствующий град освяща́ющи и христолюби́ваго царя́ веселя́щи/ и лю́ди своя́ обогаща́ющи,/ тобо́ю благода́ть исцеле́ния подаю́щи, ве́рно зову́щим ти:// ра́дуйся, Ла́заре, дру́же Бо́жий.

О, зело́ преди́вный и изря́дный дру́же Христо́в святы́й пра́ведный Ла́зарю, Вифа́нии похвало́ и всей вселе́нней превели́кое удивле́ние! Благослове́н дом твой, его́же Госпо́дь наш Иису́с Христо́с во днех пло́ти Своея́ с любо́вию посеща́ше, ви́дя ве́ру и добро́ту души́ твоея́ и боголюби́вых сесте́р твои́х Ма́рфы и Мари́и, зане́ ты возлюби́л еси́ Его́ всем се́рдцем твои́м, все́ю душе́ю твое́ю, все́ю мы́слию твое́ю и Тем до конца́ возлю́блен был еси́. Ди́вны та́йны твоя́, на тебе́ Боже́ственным Дру́гом твои́м и Го́сподом на́шим явле́нныя, я́ко изво́лися Ему́ пре́жде Креста́ Своего́ и Воскресе́ния показа́ти на тебе́ всему́ ми́ру сла́ву Свою́ и сотвори́ти тя предвозве́стника пресве́тлаго Своего́ из ме́ртвых тридне́внаго Воскресе́ния. Сего́ ра́ди Той, я́ко Влады́ка живота́ и сме́рти, попусти́ тебе́ сме́ртным сном усну́ти, и погребе́ну бы́ти, и да́же до а́довых глуби́н сни́ти, иде́же ты узре́л еси́ су́щия от ве́ка уме́ршыя во мно́жестве неисче́тном а́довыми у́зами содержи́мыя, и стра́шные стра́хи ви́дел еси́. И та́мо, егда́ те́ло твое́ возсмерде́нию сме́ртному уже́ предаде́ся, по четыре́х днех ты услы́шал еси́ Боже́ственный глас Дру́га твоего́, на гроб твой прише́дшаго: “Ла́заре, гряди́ вон!” И по гла́су сему́ ты а́бие из гро́ба возста́л еси́ и та́ко Вифа́нию возвесели́л еси́ и Ма́рфины и Мари́ины сле́зы утоли́л еси́, фарисе́и же и кни́жники, в ожесточе́нии серде́ц су́щих устраши́л еси́. Утоли́ же, святы́й дру́же Христо́в, и на́ши сле́зы, грех ра́ди на́ших пролива́емии, оживотвори́ на́ши ду́ши и телеса́, в возсмерде́нии страсте́й и нечисто́т грехо́вных су́щии, воздви́гни нас из гро́ба отчая́ния и лю́таго уны́ния, всех же нас изба́ви от ве́чныя сме́рти, я́коже и тебе́ Госпо́дь наш возста́ви от успе́ния сме́ртнаго. И умоли́ ми́лостиваго Бо́га, да сподо́бит нас прича́стницы бы́ти ве́чныя жи́зни, е́юже и ты по труде́х святи́тельства на о́строве Кри́тстем сам ны́не наслажда́ешися во оби́телех ра́йских, прославля́юще Всесвято́е и́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Пусты́нный жи́тель и в телеси́ а́нгел, богоно́сец показа́лся еси́, поще́нием и бде́нием о́тче на́ш Анто́ние, небе́сный да́р прия́л еси́: исцеля́еши неду́жныя и души́ притека́ющих с ве́рою к ра́це честны́х моще́й твои́х. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Жития́ треволне́ния, и мяте́ж мирски́й, и стра́стная взыгра́ния в ничто́же вмени́в, пусты́нный граждани́н показа́лся еси́, мно́гих бы́в наста́вник, Анто́ние преподо́бне: мона́хов собра́тель и моле́бник ве́рен, чистоты́ рачи́тель, моли́ Христа́ Бо́га спасти́ся душа́м на́шим.

О, преподо́бне о́тче на́ш Анто́ние! И́же от ю́ности твоея́ путе́м креста́ ше́ствовати возлюби́л еси́, в моли́твах и труда́х, в поще́ниях и бде́нии, в безмо́лвии и му́дрости словесе́х на вся́кий де́нь же и ча́с неусы́пно подвиза́лся, и ве́рный о́браз вруче́нней тебе́ от Го́спода бра́тии быва́я; те́мже и всего́ себе́ прине́сл ему́ в же́ртву жи́ву, свя́ту и благоуго́дну, толи́ких чуде́с дарова́ния от Него́ сподо́бися еси́, я́ко и стихи́ям повелева́ти, боле́зни теле́сныя и душе́вныя отгоня́ти, о Це́ркви и Оте́честве на́шем во благо́е прозира́ти и промышля́ти; по кончи́не же твое́й, егда́ возлю́бленное тобо́ю и благоустро́енное ме́сто сие́ злоде́йствием враго́в безбо́жных разоре́нию и запусте́нию пре́дано бы́сть, хра́м и оби́тель огне́м сожжены, бра́тия же мече́м посечены бы́ша, ты́ ве́лие дерзнове́ние к Царю́ Небе́сному име́я, па́ки хода́тайством твои́м возсозда́тися хра́му сему́, еще́ же и моще́м твои́м святы́м, я́ко сокро́вищу многоце́нному, в не́м положи́тися сотвори́л еси́; те́мже мы́ с ве́рою (стека́ющеся в хра́м се́й и свяще́нную ра́ку твою́ любе́зно целу́юще) мо́лим тя́, изве́стный хода́таю на́ш, не преста́й моля́ся ко Го́споду Бо́гу на́шему о соверша́ющих па́мять твою́, да погаси́т О́н росо́ю благода́ти Своея́ пла́мень страсте́й на́ших, да укрепи́т и препоя́шет ны́ си́лою Свое́ю свы́ше на ви́димые и неви́димые враги́ на́ша, избавля́я и исцеля́я от вся́ких неду́гов душе́вных и теле́сных и от все́х зо́л сохраня́я; па́че же да укрепи́т и да возвы́сит благослове́нную страну́ на́шу, ве́рою и благоче́стием утвержда́я, и́стиною и пра́вдою устроя́я, изоби́лием бла́г и сла́вою венча́я, ми́ром и благосостоянием огражда́я ю́; и та́ко вси́, ми́рно и безмяте́жно пребыва́я во вся́ком благоче́стии и чистоте́, вку́пе просла́вим пресвято́е и́мя Отца́ и Сы́на и Свята́го Ду́ха и твое́ ми́лостивное о на́с хода́тайство, ны́не и при́сно и во ве́ки веко́в. Ами́нь.

Го́споди Иису́се Христе́, Бо́же, Спаси́телю на́ш, Неисчерпа́емая бе́здно ми́лости, щедро́т и любве́, сме́рти и греха́ не сотвори́вый, и еще́ в раи́ определи́вый прароди́телем на́шим ве́чныя и святы́я и блаже́нныя жи́зни прича́стницы бы́ти! Егда́ же по де́йству диа́волю, человекоуби́йцы искони́, еди́ном челове́ком гре́х в ми́р вни́де и грехо́м сме́рть, тогда́ по неизрече́нному человеколю́бию Твоему́ Ты́ определи́л еси́ Кресто́м и Воскресе́нием Свои́м свободи́ти согреши́вшия лю́ди Твои́ от про́пасти а́довы и сме́рти ве́чныя. И егда́ прии́де исполне́ние време́н, Ты́ снисше́л еси́ во дне́х пло́ти Своея́, я́ко Па́стырь До́брый, на взыска́ние заблу́дших ове́ц Твои́х, и пре́жде Креста́ Своего́ и во́льныя стра́сти в Вифа́нию прише́д, Ты́ еди́ным сло́вом Ла́заря, дру́га Твоего́, уме́рша и погребе́нна, воззва́в от а́да, из ме́ртвых воскреси́л еси́. И та́ко ве́лиим си́м и стра́шным чу́дом пре́жде живоно́сныя сме́рти Твоея́ сме́ртную держа́ву потря́сл еси́, предвозвеща́я четверодне́внаго возста́нием ско́рое Твое́, Живода́вче Христе́, тридне́вное из ме́ртвых Воскресе́ние, на́с все́х уве́рил еси́, я́ко хо́щеши темнообра́зное а́дское ца́рство кре́постию Свое́ю сокруши́ти и о́бщее Воскресе́ние все́х яви́ти, показу́я Ла́заря, я́ко пакибытия́ на́шего преднача́тие спаси́тельное. Сего́ ра́ди и мы́ недосто́йнии с Ма́рфою и Мари́ею ны́не да лику́ем све́тло и с Вифа́нией да торжеству́ем, безме́рное Твое́ снисхожде́ние ны́не пра́зднующе и прослезе́нием Твои́м над Ла́зарем бу́дущее утоле́ние сле́з и сме́рти умерщвле́ние ра́достно предначина́юще. Сподо́би же и все́м на́м душа́ми чи́стыми и нескве́рными умы́, кро́тким же се́рдцем и смире́нным нра́вом, с Вифа́ниею Тебе́, кро́ткаго Влады́ку, прия́ти, и лука́ваго горды́ню сокруши́ти, и отве́рсти вхо́ды серде́ц на́ших, да с ве́рою, я́коже Мари́я, пома́жем ми́ром любве́ пречи́стии но́зи Твои́, и со всеусе́рдием мно́гим, я́ко же Ма́рфа, послу́жим Тебе́, вкуша́юще Пречи́стое Те́ло и Са́мую Честну́ю Кро́вь Твою́ на та́инственной Ве́чери Твое́й, на не́йже обля́зи с на́ми и источи́ на́м многоце́нное моли́твы ми́ро, и сле́зы покая́ния, и благоуха́ние целому́дрия и чистоты́, да та́ко благоукраше́ннии и просвеще́ннии, услы́шим глаше́ние Твое́: “Се́ стою́ при две́рех и толку́”, и по гла́су Твоему́ да отве́рзем две́ри се́рдца и оби́тель сотвори́м Тебе́, вы́ну служа́ще Тебе́ и прославля́юще Тя́ со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.