О, святи́и уго́дницы Бо́жии, му́ченицы и безсре́бреницы Ки́ре и Иоа́нне! По́двигом до́брым подвиза́вшася на земли́, восприя́ли еста́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й ваш о́браз, ра́дуемся о пресла́внем сконча́нии жи́тельства ва́шего и чтим святу́ю па́мять ва́шу. Вы же, предстоя́ Престо́лу Бо́жию, приими́те моле́ния на́ша и ко Всеми́лостивому Бо́гу принеси́те, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством ва́шим, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

О, вели́ции отцы́ на́ши, Христо́вы уго́дницы и те́плии предста́тели ко Спа́су о душа́х на́ших, Се́ргие и Ге́рмане! Вы бо в неду́зех цели́тели яви́стеся, по мо́рю пла́вающим ко́рмчии, и утопа́ющим благонаде́жное избав­ле́ние, и от вся́каго смертоно́снаго наше́ствия храни́тели, па́че же от духо́в нечи́стых свобожде́ние и вся́ких наве́тов, проти́ву нас содержи́мых, очище́ние и по́мощь. О, преблаже́ннии отцы́ и чудотво́рцы пресла́внии, Се́ргие и Ге́рмане, моли́теся ко Влады́це Христу́ о нас, гре́шных, я́ко да ва́шими моли́твами сподо́бимся в день Су́дный десна́го предстоя́ния и наслажде́ния во Ца́рствии Бо́жии во ве́ки веко́в. Ами́нь.

О, преподо́бнии и Богоно́снии отцы́ на́ши Се́ргие и Ге́рмане! С ве́рою и любо́вию припа́даюше к святе́й ико́не ва́шей, умиле́нно мо́лим вас: не забу́дите нас, недосто́йных и гре́шных (имена), но предста́тельством ва́шим огради́те нас от злых ко́зней вра́жиих: утоли́те возста́ние страсте́й: укрепи́те не́мощь на́шу в духо́вных бра́нех и по́двизех, предлежа́щих нам: отжени́те вся́кое уны́ние и печа́ль грехо́вную от серде́ц на́ших, и Небе́сное утеше́ние низпосли́те нам во труде́х и ско́рбех на́ших. В стра́шный же час сме́ртный предста́ните всем нам, я́ко же блази́и хода́таи и те́мных зра́ков де́монских прогони́телие: да в ми́ре и покая́нии сконча́вше земно́е по́прище на́ше, дости́гнем и ве́чных благ наслажде́ния, и ку́пно с ва́ми да воспое́м и просла́вим всесвято́е и́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

О, всеблаже́ннии и Богому́дрии уго́дницы, и́же во вре́меннем житии́ благоче́стно подвиза́вшиися и святы́ми свои́ми телесы́ в преде́лех Волого́дския страны́ почива́ющии, велича́ем ва́ша духо́вныя по́двиги, во́ини Христо́вы, терпе́нием и му́жеством свои́м врага́ до конца́ низложи́вшии и нас от пре́лести и ко́зней его́ избавля́ющии. Ублажа́ем ва́ше свято́е житие́, свети́льницы Боже́ственнии, зве́зды, све́том ве́ры и доброде́тели светя́щиися и на́ши умы́ и сердца́ богому́дренне озаря́ющия. Прославля́ем ва́ша вели́кая чудеса́, кри́нове ра́йстии, в стране́ мра́за прекра́сне процве́тшии и воне́ю дарова́ний и чуде́с повсю́ду благоуха́ющии. Умоля́ем ва́шу богоподража́тельную любо́вь, предста́телие на́ши и покрови́телие, сохрани́те нас от вся́каго зла и посети́те нас в не́мощех на́ших благода́тными дарова́нии, и́миже вас украси́л и просла́вил есть Госпо́дь. Благове́рнии кня́зие, испроси́те у вели́каго Царя́ Сла́вы благоде́нственное житие́ нам, мир и тишину́ стране́ на́шей, да ти́хое и безмо́лвное житие́ поживе́м, умерщвля́я ца́рствующий во пло́ти на́шей грех и напису́я на скрижа́лех серде́ц на́ших зако́н Ца́рский. Святи́телие Христо́ви, моли́твами ва́шими утверди́те Святу́ю Правосла́вную Це́рковь и упаси́те ста́до свое́ в ве́ре и доброде́тели, я́ко да и мы, недосто́йнии и оскверне́ннии, просла́вим в житии́ свое́м Отца́ на́шего Небе́снаго. Преподо́бнии отцы́, в терпе́нии и по́двизех са́ми пожи́вше, сохрани́те и нас от пре́лестей ми́ра лука́ваго, да, отве́ргшеся себе́ и взе́мше крест, после́дуем Христу́, умерщвля́я у́ды, я́же на земли́, и распина́я плоть свою́ со страстьми́ и похотьми́. Блаже́ннии чудотво́рцы, юро́дством Небе́сныя му́дрости посрами́те му́дрость ми́ра сего́, вознося́щуюся на ра́зум Бо́жий и омрача́ющую спаси́тельное бу́йство Креста́ Христо́ва, и́мже да сподо́бимся вы́ну му́дрствовати о Христе́, Го́рняя, а не земна́я помышля́юще. О всечестны́й собо́ре всеблаже́нных А́нгелов на́ших, и́же честны́ми телесы́ на земли́ с на́ми водворя́етеся, святы́ми же душа́ми ва́шими пребыва́ете на Небеси́ и с ли́ки Безпло́тных покланя́етеся ди́вному во святы́х Свои́х Бо́гу, помяни́те на́шу не́мощь и уничиже́ние и свяще́нными моли́твами ва́шими испроси́те у Христа́ Бо́га на́шего, я́ко да и мы, безбе́дне преплы́вше жите́йскую пучи́ну и невреди́мо соблю́дше сокро́вище ве́ры, в приста́нище ве́чнаго спасе́ния дости́гнем и в блаже́нных оби́телех Го́рняго оте́чества со все́ми, от ве́ка угоди́вшими святы́ми, водвори́мся, благода́тию и человеколю́бием Спаси́теля на́шего и Го́спода Иису́са Христа́, Ему́же с Предве́чным и Единосу́щным Отце́м и с Пресвяты́м Ду́хом подоба́ет непреста́нное славосло́вие и поклоне́ние от всех тва́рей в безконе́чныя ве́ки. Ами́нь.

О, преподо́бнии и богоно́снии отцы́ на́ши и вси пра́ведницы, Новгоро́дская свети́ла вели́кая земна́я, в Росси́йстей земли́ сла́вно просия́вшии и сию́ мно́гими светоза́рными ангелора́внаго ва́шего жития́ зве́здами украси́вшии, всю же вселе́нную высо́ких доброде́телей светлостьми́ и чуде́с Боже́ственных блиста́нии удиви́вшии, и ны́не, к сме́ртному за́паду пло́тски во гроб заше́дшии, ду́шами со Христо́м, Со́лнцем пра́вды, су́щии пра́ведницы, просвеща́етеся, я́ко сном во Ца́рствии Небе́снем, иде́же ны́не моли́твы ва́ша к Бо́гу Све́ту, лучи́, о оте́честве свое́м, простира́юще, не забу́дите и нас, в нощи́ страсте́й и скорбе́й пребыва́ющих, всегда́шнии на́ши моли́твенницы, свы́ше бога́тыми призира́ти осия́нии, я́ко да во све́те доброде́тельнаго ва́шего жития́ пра́во ходя́ще, сподо́бимся зре́ти Свет непристу́пный Сла́вы Бо́жия, хва́ляще Его́ ку́пно с ва́ми в несконча́емыя ве́ки. Ами́нь.

О, преподо́бнии и богоно́снии отцы́ на́ши, па́стырие и учи́телие, по́стницы и испове́дницы, к вам прибега́ем, вам мо́лимся и ми́ли ся де́ем, не забу́дите нас, прибега́ющих к вам, бу́дите моли́твенницы о оте́честве ва́шем, мы же я́ко смире́ннии и немощни́и су́ще, ничто́же возмо́жем твори́ти без ва́шего заступле́ния, про́сим предста́тельства ва́шего на мо́ри и на су́ше, в беда́х утеше́ния, в несча́стии покрови́тельства, в оби́дах заступле́ния и во всех приключа́ющихся злых – ра́дости и упова́ния, те́мже, не я́ко неключи́ми раби́, но я́ко ва́ши сы́нове да пребу́дем и моли́твами ва́шими живо́т ве́чный в Ца́рствии Невече́рнем насле́дим. Ами́нь.

О, Пресвята́я Госпоже́ Влады́чице Богоро́дице, ве́лие чу́до свято́му Иоа́нну Дамаски́ну яви́вшая, я́ко ве́ру и́стинную – наде́жду несумне́нную показа́вшему! Услы́ши нас, гре́шных, пред чудотво́рною Твое́ю ико́ною усе́рдно моля́щихся и прося́щих Твоея́ по́мощи: не отри́ни моле́ния сего́ мно́гих ра́ди прегреше́ний на́ших, но, я́ко Ма́ти милосе́рдия и щедро́т, изба́ви нас от боле́зней, скорбе́й и печа́лей, прости́ соде́янныя на́ми грехи́, испо́лни ра́дости и весе́лия всех, чту́щих святу́ю ико́ну Твою́, да ра́достно воспое́м и любо́вию просла́вим и́мя Твое́, я́ко Ты еси́ от всех родо́в избра́нная и благослове́нная во ве́ки веко́в. Ами́нь.

О, Пресвята́я и Преблагослове́нная Де́во, Богоро́дице Мари́е! Припа́даем и покланя́емся Тебе́ пред свято́ю ико́ною Твое́ю, воспомина́юще пресла́вное чу́до Твое́, исцеле́нием усе́ченныя десни́цы преподо́бнаго Иоа́нна Дамаски́на, от ико́ны сей явле́нное, его́же зна́мение доны́не ви́димо есть на ней, во о́бразе тре́тия руки́, ко изображе́нию Твоему́ приложе́нныя. Мо́лимся Ти и про́сим Тя, Всеблагу́ю и Всеще́друю ро́да на́шего Засту́пницу: услы́ши нас, моля́щихся Тебе́, и я́коже блаже́ннаго Иоа́нна, в ско́рби и боле́зни к Тебе́ возопи́вшаго, услы́шала еси́, та́ко и нас не пре́зри, скорбя́щих и боле́знующих ра́нами страсте́й многоразли́чных, не пре́зри, усе́рдно к Тебе́ от души́ сокруше́нныя прибега́ющих. Ты зри́ши, Госпоже́ Всеми́лостивая, не́мощи на́ша, озлобле́ние на́ше, нужду́, во Твое́й по́мощи потре́бу, я́ко отвсю́ду врази́ окружа́ют нас, и несть помога́ющего, ниже́ заступа́ющаго, а́ще не Ты умилосе́рдишися о нас, Влады́чице. Ей, мо́лим Ти ся, вонми́ гла́су боле́зненному на́шему и помози́ нам святооте́ческую Правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти, покая́ние и́стинное о гресе́х на́ших всегда́ Бо́гу приноси́ти и сподо́битися ми́рныя христиа́нския кончи́ны и до́браго отве́та на стра́шнем суде́ Сы́на Твоего́ и Бо́га на́шего. Его́же умоли́ за нас ма́тернею моли́твою Твое́ю, да не осу́дит нас по беззако́нием на́шим, но да поми́лует нас по вели́цей и неизрече́нной ми́лости Свое́й. О, Всеблага́я! Услы́ши нас и не лиши́ нас по́мощи Твоея́ держа́вныя, да, Тобо́ю спасе́ние получи́вше, воспое́м и просла́вим Тя на земли́ живы́х и Ро́ждшагося от Тебе́ Искупи́теля на́шего, Го́спода Иису́са Христ́а, Ему́же подоба́ет сла́ва и держа́ва, честь и поклоне́ние, ку́пно со Отце́м и Святы́м Ду́хом, всегда́, ны́не и при́сно и во ве́ки веко́в. Ами́нь.